Иймд, манай банкны салбарынхан ойн салбарыг эдийн засгийн чухал ач холбогдолтой салбар  гэж харах цаг болсон гэдгийг ойн салбарын аж ахуйн нэгжийн төлөөлөл хүсч байлаа. Харин  Төрийн банкныхан зээлийн шилдэг мэргэжилтнүүдээ хэлэлцүүлэгт оролцуулан,  Ногоон зээлийн бүтээгдэхүүнүүдээ танилцуулахын зэрэгцээ ойн салбарт өмнө нь газар эзэмших ашиглах гэрчилгээ гээд элдэв бичиг баримт шаарддаг байсан бол одоо  зээл төлөх орлого нь тодорхой байхаас гадна банкны зээлийн эдийн засагчид өөрт нь тохирсон ямар бүтээгдэхүүн байгааг тодруулаад шаардлагатай үйлчилгээгээ авахад уян хатан болсон гэж танилцуулаад Төрийн банкны шилдэг эдийн засагчдаар зээлээ судлуулахыг урилаа.  

Ингээд Ойн салбарынхан Банкны зээлийн эдийн засагчдыг оролцуулсан үйлдвэрлэлийн аялал зохион байгуулж, бидний ажлын онцлог, түүнд тохирсон шинэ бүтээгдэхүүн гаргах хүсэлт тавилаа. Мөн карбон кредит хүчтэй яригдах болсон тул үүн дээр банкны салбарынхан орж ирвэл хөрөнгө оруулалт босгох шинэ боломж бий  гэдгийг хэлж байлаа.  

Манай улсын нутаг дэвсгэрийн 8 хувь буюу 19 сая га газар нь ой бөгөөд Тэрбум мод үндэсний хөдөлгөөний үр дүнд энэ хувь хэмжээг 9 хувь болгох зорилт тавиад байна.  Энэ салбарт ажиллаж байгаа 1000 гаруй  аж ахуйн нэгж, нөхөрлөл, ойн анги, сумын болон сум дундын ойн анги, ТББ-ынханд уян хатан нөхцөлтэй хүү багатай, хугацаа урттай зээл хэрэгтэй байгаа бол Банкны салбарынханд ногоон зээлийн багцаа өсгөх, харилцагчийнхаа хүсэлтийг ойлгох хэрэгцээ  байгааг онцоллоо. Иймд хоёр талын энэ эрэлт хэрэгцээг нэг цэгт уясан зээл, даатгалын бүтээгдэхүүнийг хэрхэн гаргах вэ гэдэг талаар Тэрбум мод сангийн санаачилгаар анх удаа, үр дүнтэй нетворк уулзалтыг зохион байгууллаа. Ийм уулзалтыг зохион байгуулсанд Ойн салбарынхан тун талархалтай хүлээж авлаа. Ойн салбарын онцлогт тохирсон банк, даатгалын шинэ бүтээгдэхүүн гаргах ажлын уулзалт шинэ онд ч  үргэлжилнэ. Үүний тулд ойн салбарынхан яаж ажилладгийг танилцуулах ажлын аялал зохион байгуулахаар талууд тохирлоо.